Latest News

Pormal nang pinasinayaan nitong Martes ng umaga, Oktubre 4, 2016 sa campus ng Sapinit Elementary School sa Barangay San Juan ang Material Recovery Facility o MRF ng paaralan. Ang MRF na ito ay naglalayong mabawasan ang nalilikhang basura ng paaralan sa pamamagitan ng pagrecycle ng mga piling uri ng basura upang gawing mga kapaki-pakinabang na palamuti, kasangkapan sa bahay at laruan. Ang naturang okasyon ay dinaluhan ni Antipolo City 2nd District Councilor Nixon Aranas, San Juan Barangay Captain Julie Bolanos at mga kinatawan mula sa City Environment and Waste Management Office.

NAKIISA ang Pamahalaang Lungsod ng Antipolo, sa pamumuno ni Mayor Jun Ynares, katuwang ang City Environment and Waste Management Office (CEWMO), sa isinagawang clean-up activity ng lungsod sa Tagbak River, Brgy. San Jose noong Setyembre 23, 2016 bilang suporta sa “OPLAN Busilak (Buhayin Sapa, Ilog, Lawa at Karagatan)” ng Rizal Provincial Government. Dinaluhan ang programa ng mahigit 600 government employees at volunteers mula sa mga pribadong kumpanya na may layuning buhayin ang mga waterways sa buong probinsya  ng Rizal upang mapakinabangan ng mga susunod pang salinlahi.

MULING nagkaroon ng magandang ugnayan ang Antipolo City at bansang South Korea sa pamamagitan ng programang Philippine-Korea Bilateral Youth Exchange Program 2016. Sinalubong ng Pamahalaang Lungsod ng Antipolo ang 10 delegado mula sa South Korea, kasama ang mga kawani ng National Youth Commission, sa idinaos na pagtitipon sa Cloud 9 Resort sa lungsod na ito noong Setyembre 29, 2016. Pinagtibay ng naturang programa ang pagkakaibigan, pagpapahalaga sa kultura at pagkakaunawaan ng mga kabataan sa pagitan ng dalawang bansa.

NAGBIGAY ng libreng “Urban Vegetable Gardening Seminar” ang Pamahalaang Lungsod ng Antipolo, sa pamumuno ni Mayor Jun Ynares, sa mga mag-aaral ng Dalig National High School noong Setyembre 14, 2016 bilang suporta sa proyektong “Gulayan sa Paaralan” ng Department of Education (DepEd).  Pinangasiwaan ng City Agriculture Office (CAO) ang naturang seminar na may layuning turuan ng tamang pagtatanim ng gulay ang mga mag-aaral upang mapalago ang kanilang gulayan sa paaralan. Naghandog ang pamahalaang lungsod sa isinagawang programa ng 250 sachets ng vegetables seeds kabilang ang petsay, talong, kamatis, okra at mustasa.

NAGTANIM ng mahigit 1,500 na seedlings ang Pamahalaang Lungsod ng Antipolo sa Sitio Bolitinao, Brgy. Calawis noong Setyembre 24, 2016 sa pagdiriwang ng ika-3 taong anibersaryo ng Ynares Eco-System (YES) program at ng Pista ng Kagubatan 2016. Nakiisa ang halos 800 volunteers mula sa pamahalaang lokal, mga barangay at pribadong kumpanya sa pagtatanim ng mga punong narra, cacao, kasoy, chesa, kaimito at langka. 

BILANG hakbang ng Pamahalaang Lungsod ng Antipolo sa patuloy na pagsuko ng mga drug users at pushers, sumailalim sa isang seminar ukol sa pagsusuri at pagkaklasipika sa mga drug dependents ang 220 na Barangay Health Workers (BHW), katuwang ang mga kinatawan ng Department of Health Tagaytay Rehabilitation Center (DOH-TRC), noong Setyembre 20, 2016 sa Antipolo City Hall.

Nabigyang kaalaman sa pangkabuhayan ang 46 na residente ng Cupang sa ginanap na “Meat Processing Training” ng Pamahalaang Lungsod ng Antipolo noong Setyembre 24, 2016 na idinaos sa Cupang National High School. Pinangunahan ito ng City Cooperative and Livelihood Office (CCLO) at ng mga opisyales ng barangay bilang bahagi na rin ng programang “Hanap Buhay sa Bawat Bahay.”

UMABOT sa 60 siklista ang nakipadyak sa “Car-Free Day Philippines: Bike to Work, Bike to School 2016” ng Pamahalaang Lungsod ng Antipolo at ng Bicycle Friendly Philippines (BFP) noong Setyembre 23, 2016 bilang pagdiriwang ng World Carfree Day. Nagtipon-tipon sa Robinsons Place Antipolo ang mga siklista at nagbisekleta papuntang Antipolo City Hall upang iparating sa mga mamamayan na suportahan ang hindi paggamit ng sasakyan ng isang buong araw.

ARESTADO ang apat na kalalakihan na nagsasabong sa Purok 1, Zone 8, Brgy. Cupang sa Special Operation na isinagawa ng Pamahalaang Lungsod ng Antipolo, sa pamumuno ni Mayor Jun Ynares, noong Setyembre 11, 2016. Pinangunahan ng opisina ng City Peace and Order Concerns (CPOC) ang operation kung saan huli sa akto ang apat na tumataya sa tupada.

NAKIPAGPULONG ang Pamahalaang Lungsod ng Antipolo sa mga miyembro ng business sector tungkol sa mahigpit na pagpapatupad ng paglalagay ng Material Recovery Facilities (MRFs) sa mga business establishment sa lungsod sa isinagawang Coordination Meeting ng City Environment and Waste Management Office (CEWMO) sa Hinulugang Taktak Hall, Antipolo City Hall noong Setyembre 13, 2016.